‘प्रवृत्तिगत अध्ययन गरी अभिलेखमा’
सञ्चार माध्यमहरूमा प्रकाशित समाचार सामग्रीमा पत्रकार आचारसंहिता पालना भए नभएको अनुगमन गर्ने निकाय प्रेस काउन्सिल नेपालले पत्रकारहरूको सामाजिक सञ्जालमा पनि नजर राख्न थालेको छ ।
“कतिपय पत्रकारहरूबाट प्रयोग भएको सामाजिक सञ्जालको प्रवृत्तिगत अध्ययन गरी अभिलेखमा राखेको” काउन्सिलले जनाएको छ ।
काउन्सिलका सूचना अधिकारी एवं उपप्रशासकीय अधिकृत रामशरण बोहराद्वारा मंगलबार जारी विज्ञप्तिमा “कोरोनाबाट सङ्क्रमित र मृत्यु भएका व्यक्तिको पहिचान खुल्ने तस्बिर, वैयक्तिक विवरण एवम् मृतकको सामूहिक दाहसंस्कारका तस्बिरहरू विभिन्न सञ्चारमाध्यम र सामाजिक सञ्जालमा पोस्ट भएका घटनाप्रति ध्यानाकर्षण भएको” उल्लेख छ । समाचार सामग्री सम्प्रेषण गर्दा सजगता अपनाउन पनि विज्ञप्तिमा अपिल गरिएको छ ।
पत्रकारबाटै सामाजिक सञ्जालमा सामूहिक दाहसंस्कार लगायत तस्बिरहरू पोस्ट भएकोमा काउन्सिलले आपत्ति जनाएको छ।
“अझ यस महामारीमा पनि ज्यान जोखिममा राखेर आमजनतालाई सूचना, समाचार सम्प्रेषण गर्न कायक्षेत्रमा खटिएका कतिपय पत्रकार/सञ्चारकर्मीले समेत यस्ता तस्बिरहरू आ–आफ्नो सामाजिक सञ्जालमा राखेको पाइएको छ”, विज्ञप्तिमा भनिएको छ ।
काउन्सिलले आफ्नो कार्यालयबाट तथा काउन्सिलका मिडिया अनुगमनकर्ताहरूले आआफ्ना निवासबाट यस्ता सामग्रीहरूमा नियमित नजर राखिरहेको विज्ञप्तिमा उल्लेख छ ।
कतिपय पत्रकारले प्रेस काउन्सिल नेपाल सरकारको लाइनमा खडा भएको टिप्पणी गरेका छन् । कोभिड-१९ नियन्त्रणमा असफल बनेको सरकारको कमजाेरी र चरित्र उदांगो हुने भएपछि काउन्सिलले विज्ञप्ति नै निकालिदिएको टिप्पणी पत्रकार यम बमले फेसबुकमा गरेका छन् ।
सिकिस्त बिरामीलाई पनि अस्पतालमा बेड छैन भनेर केही दिन अघि सार्वजनिक सूचना जारी गरेको सरकारका लागि बढ्दो मृत्युका बीच शव व्यवस्थापन पनि कठिन बनेको थियो । कोभिड-१९ को प्रकोप बढ्न थालेपछि पशुपति क्षेत्रस्थित विद्युतीय शवदाहगृह र घाटमा चाप बढेको छ । कोरोनाबाट मृत्यु हुनेको शव पनि वाग्मती किनारमै जलाउन थालिएको छ ।
“काउन्सिलले यस्ता विषयमा कार्यालय र आ–आफ्नो निवासबाट समेत नियमितरूपमा अनुगमन गरी पत्रकार आचारसंहिता, २०७३ (पहिलो संशोधन, २०७६) र कोरोना भाइरस सङ्क्रमण सम्बन्धमा २०७६ चैत १० गते जारी निर्देशिकाबमोजिम केही मिडियाको ध्यानाकर्षण गराउँदै कतिपय पत्रकारहरूबाट प्रयोग भएको सामाजिक सञ्जालको प्रवृत्तिगत अध्ययन गरी अभिलेखमा राखेको छ”, विज्ञप्तिमा भनिएको छ ।
पत्रकार आचारसंहिता र निर्देशिकाअनुसार केही मिडियाको ध्यानाकर्षण गरिसकेको काउन्सिलले जनाएको छ । प्रेस काउन्सिलले २०७६ चैत १० गते कोरोनाको महामारीविरुद्ध समाचार सम्प्रेषण गर्दा पत्रकार र सञ्चारमाध्यमले पालना गर्नुपर्ने दायित्व भन्दै ९ बुँदे निर्देशिका जारी गरेको थियो ।
काउन्सिलले गोपनीयतासम्बन्धी मौलिक हकको प्रतिकूल हुने, मानवीय संवेदना खल्बलिने, प्रभावित व्यक्तिलाई थप पीडा पुग्ने तथा संक्रमित बिरामीको आत्मबलमा असर परी क्षति हुनसक्ने हुँदा अझ जिम्मेवार र सजग भइ थप सावधानी अपनाउन आमपत्रकार, सञ्चारकर्मी, सञ्चारमाध्यम, सामाजिक सञ्जालका प्रयोगकर्तामा अपिल गरेको छ ।
मूलधारका मिडियाका समाचार सामग्री समेत प्रभावकारी अनुगमन गर्न नसकिरहेको काउन्सिलले पत्रकारका फेसबुक, ट्विटरसहितका सामाजिक सञ्जाल अनुगमन गर्न सक्ला त ? काउन्सिलले पत्रकारको फेसबुक लगायत सोसल मिडियामा नजर राख्न थालेको तपाईँलाई कस्तो लाग्यो ? कृपया कमेन्टमा लेख्नुहोस् ।
हेर्नुहोस् काउन्सिलको विज्ञप्तिः
