नेपाल पत्रकार महासंघले सुनसरीलगायतका विभिन्न जिल्लामा पछिल्लो समय भएका घटनाक्रमप्रति चिन्ता व्यक्त गर्दै सामाजिक सद्भाव र धार्मिक सहिष्णुता कायम राख्न विशेष आह्वान गरेको छ ।
महासंघका कार्यवाहक अध्यक्ष दीपक आचार्यले जारी गरेको विज्ञप्तिमा प्रदर्शन र झडपका क्रममा तीन जनाको ज्यान गएको घटनाप्रति दुःख व्यक्त गर्दै सबै पक्षलाई संयमता अपनाउन आग्रह गरिएको हो ।
महासंघले नेपालको जातीय र धार्मिक विविधतालाई राष्ट्रिय शक्तिको आधार मान्दै यसलाई कमजोर बनाउने गतिविधि नगर्न सचेत गराएको छ ।
"सामाजिक सद्भाव, धार्मिक सहिष्णुता र शान्तिपूर्ण वातावरण कायम राख्न सबै राजनीतिक दल, धार्मिक समुदाय, नागरिक समाज, सञ्चारमाध्यम तथा आमनागरिकले उच्च जिम्मेवारी र संयमता प्रदर्शन गर्नु अपरिहार्य छ", विज्ञप्तिमा भनिएको छ ।
महासंघले भ्रम र घृणा फैलाउने कार्यबाट टाढा रहन आग्रह गर्दै विशेष गरी सामाजिक सञ्जालको दुरुपयोगप्रति ध्यानाकर्षण पनि गराएको छ ।
महासंघले सबै पक्षलाई अधिकतम संयमता अपनाउन तथा अफवाह, घृणा, विभाजन र हिंसालाई प्रोत्साहन गर्ने अभिव्यक्ति, उत्तेजनात्मक प्रचारप्रसार र सामाजिक सञ्जालमार्फत प्रसारित भ्रामक तथा अपुष्ट सामग्रीको प्रसारबाट पूर्ण रूपमा टाढा रहन" आग्रह पनि गरेको छ ।
विज्ञप्तिमा सत्य, तथ्य र सन्तुलित सूचना सम्प्रेषणमार्फत सामाजिक सद्भाव, शान्ति र नागरिक विश्वास अभिवृद्धि गर्न सञ्चार क्षेत्रले विशेष भूमिका निर्वाह गर्नुपर्ने उल्लेख छ ।
महासंघले पत्रकार तथा सञ्चारकर्मीहरूलाई उच्च व्यावसायिक आचरण र आचारसंहिताको पूर्ण पालना गर्न समेत अनुरोध गरेको छ ।
यसैगरी, महासंघले घटनाको निष्पक्ष र स्वतन्त्र अनुसन्धान गरी दोषीमाथि कानुनी कारबाही गर्न र पीडित परिवारलाई उचित क्षतिपूर्ति दिन सरकारसँग माग गरेको छ ।
सुरक्षा व्यवस्थापनका क्रममा "मानवअधिकारको पूर्ण सम्मान, कानुनी शासनको पालना तथा न्यूनतम बल प्रयोगको सिद्धान्तलाई कडाइका साथ अवलम्बन गर्न" पनि महासंघले ध्यानाकर्षण गराएको छ ।
