कान्तिपुर मिडिया ग्रुपको महाप्रबन्धकमा मनोज बस्नेत नियुक्त भएका छन् ।
कान्तिपुर मिडिया ग्रुपले असार १७ गतेदेखि लागू हुने गरी बस्नेतलाई कान्तिपुरको महाप्रबन्धक पदमा नियुक्त गरेको ग्रुपका प्रमुख कार्यकरी अधिकृत महेश स्वारले जानकारी दिए ।
यसअघि बस्नेत दुई वर्ष अन्नपूर्ण मिडिया नेटवर्कमा महाप्रबन्धक थिए । उनले जेठ अन्तिम साता अन्नपूर्ण मिडियाबाट राजीनामा दिएका थिए ।
१९ वर्षअघि काभ्रे जिल्ला संवाददाता भएर कान्तिपुर दैनिकबाट काम सुरु गरेका बस्नेतसँग समाचार रिपोर्टिङ, सेल्स, वितरण, मार्केटिङ, कर्पोरेट रणनीति, कार्यसम्पादन व्यवस्थापन, ब्रान्ड व्यवस्थापन लगायतका क्षेत्रमा काम गरेको अनुभव छ ।
“पछिल्ला वर्षहरूमा छापा माध्यमको स्थायित्वलाई लिएर अन्यौलताहरू देखिएका छन् । छापा र डिजिटललाई एकआपसमा जोड्नेमा मेरो ध्यान हुनेछ”, बस्नेतले भने, “संस्था बाँचे मात्र हामी बाँच्छौँ । यो मान्यतालाई आत्मासाथ गर्दै दिएको जिम्मेवारी पुरा गर्न कुनै कसर बाँकी राख्ने छैन ।”
बस्नेतसँग सञ्चार र व्यवस्थापन क्षेत्रको लामो राष्ट्रिय र अन्तर्राष्ट्रिय अनुभव छ । उनी अमेरिकन मार्केटिङ एसोसिएसन, इन्टरनेसनल फेडरेसन अफ जर्नालिस्ट (IFJ) र इन्टरनेशनल न्यूज मिडिया एसोसिएसन (INMA) जस्ता प्रतिष्ठित संस्थाहरूमा आबद्ध छन् ।
उनले सञ्चार र मानवीय कार्यमा पुर्याएको योगदानका लागि अमेरिकाबाट 'युनेस्को युथ पिस एम्बेसडर अवार्ड', भारतबाट 'कोरोना योद्धा सेवा अवार्ड' र अमेरिकाकै 'मिडिया लिडर अफ द एयर अवार्ड' प्राप्त गरेका छन् ।
साथै, न्युयोर्क स्टेट एसेम्बली र स्टेट सिनेटका विभिन्न सदस्यहरूले उनलाई 'असाधारण नेतृत्व', 'कार्यसम्पादन व्यवस्थापन' र 'मिडिया लिडर' का रूपमा सम्मान तथा प्रशंसापत्र प्रदान गरेका छन् ।
संस्थागत रूपमा पनि उनी कान्तिपुर मिडिया ग्रुपबाट 'चियरम्यान एक्सिलेन्स अवार्ड' र अन्नपूर्ण मिडिया नेटवर्कबाट 'बेस्ट इम्प्लोइ अफ द एयर' अवार्डबाट सम्मानित भइसकेका छन् ।
