नेपाल पत्रकार महासंघले समावेशी, सुरक्षित र सम्मानपूर्वक काम गर्ने वातावरण प्रदान गर्ने सञ्चारमाध्यमहरूलाई प्रोत्साहित गर्न सर्वोत्कृष्ट सञ्चारमाध्यम अवार्ड (Best Media Award) का लागि आवेदन आह्वान गरेको छ ।
युरोपियन युनियनको आर्थिक सहयोगमा इन्टरनेशनल अलर्ट, नेपाल पत्रकार महासंघ, सञ्चारिका समूह नेपाल तथा एकाउन्टेबिलिटी ल्याब नेपालको संयुक्त पहलमा सञ्चालित "Strengthening Democracy: Voice, Civic Engagement, and Accountability" परियोजना अन्तर्गत अवार्ड प्रदान गरिन लागेको महासंघले जनाएको छ ।
महासंघका अनुसार यो अवार्ड नेपाली सञ्चारमाध्यमहरूमा लैंगिक समानता तथा सामाजिक समावेशीकरण प्रवर्धन गर्न थालिएको पहल हो । नेपाली मिडिया क्षेत्रमा महिला तथा सीमान्तकृत समूहका पत्रकारहरूको सहभागिता बढाउन र तिनका लागि सुरक्षित ढङ्गले काम गर्ने वातावरण निर्माण गर्न संचारमाध्यमहरूले गरेका उत्कृष्ट अभ्यासहरूलाई प्रोत्साहित गर्न अवार्ड सुरु गरिएको महासंघको सूचनामा उल्लेख छ ।
अवार्डका लागि आवेदन गर्ने सञ्चारमाध्यमहरूको मूल्यांकनका लागि महासंघले विभिन्न सूचकहरू तय गरेको छ । लैंगिक तथा सामाजिक समावेशीकरण नीतिको निर्माण र कार्यान्वयन, महिला र सीमान्तकृत समुदायका मुद्धालाई प्राथमिकताका साथ प्रकाशन/प्रसारण, समाचार कक्षमा महिला पत्रकारहरूको सहभागिता लगायतका मापदण्ड तोकिएको छ ।
यस्तै संचारमाध्यमको व्यवस्थापकीय नेतृत्त्व तहमा महिलाको उपस्थिति, लैङ्गिक हिंसा र दुर्व्यवहारका घटनामा गुनासो व्यवस्थापन संयन्त्रको निर्माण र कार्यान्वयन, महिला र सीमान्तकृत कर्मचारीहरूका लागि विशेष सुविधाहरू र क्षमता अभिवृद्धिका अवसरहरू, अपाङ्गमैत्री कार्य वातावरण र पत्रकार सुरक्षाका लागि अपनाइएका उपायहरूका आधारमा उत्कृष्ट सञ्चार माध्यम छानिने महासंघले जनाएको छ ।
इच्छुक संचारमाध्यमहरूले अनलाइन फारम भरेर आवेदन दिन सक्नेछन् । आवेदनसँगै दर्ता प्रमाणपत्र, नवीकरण प्रमाणपत्र, GESI नीतिहरू र अन्य सान्दर्भिक प्रमाणहरू अपलोड गर्नुपर्नेछ ।
आवेदन दिने अन्तिम मिति २०८२ वैशाख १२ गते (अप्रिल २५, २०२५) तोकिएको छ । अवार्ड वितरण विश्व प्रेस स्वतन्त्रता दिवसको अवसरमा २०८२ वैशाख २० गते (मे ३, २०२५) मा हुने महासंघले जनाएको छ ।
