नेकपा (माओवादी केन्द्र) निटक पत्रकारहरूको संगठन प्रेस सेन्टर नेपालको अध्यक्षमा कमल गिरी निर्वाचित भएका छन् । प्रेस सेन्टरको इतिहासमा पहिलो पटक नेतृत्त्व चयन निर्वाचन प्रक्रियाबाट भएको हो ।
कमल गिरीले निकटतम प्रतिद्वन्द्वी दीपेन्द्र रावललाई १९१ मतको अन्तरले पराजित गरे । गिरीले ३६६ मत प्राप्त गरेका थिए भने रावलले १७५ मत पाए ।
वरिष्ठ उपाध्यक्षमा सुरेशचन्द्र अधिकारी निर्वाचित भएका छन् । उनले सुदिप बर्देवालाई २८६ मतको फराकिलो अन्तरले हराए । अधिकारीले ३९७ मत प्राप्त गरेका थिए भने बर्देवाले १११ मत पाए ।
उपाध्यक्ष पदहरूमा पाँच जना निर्विरोध निर्वाचित भए । खुला कोटामा रामसिंह ठगुन्ना, लक्ष्मण खड्का र विवेक गौतम, महिला उपाध्यक्षमा शान्ता अधिकारी र समावेशी कोटाको उपाध्यक्षमा दीपक श्रेष्ठ निर्विरोध चयन भए ।
महासचिवमा मनोज घर्तीमगरले दीपेन्द्र शर्मामाथि २३१ मतको अन्तरले विजयी भए । घर्तीमगरले ३७९ मत प्राप्त गरेका थिए भने शर्माले १४८ मत पाए ।
उपमहासचिव खुलामा ज्ञानप्रसाद पौडेल जम्मा ९ मतको अन्तरले बोमलाल गिरीलाई हराउँदै निर्वाचित भए । अन्य उपमहासचिव पदहरूमा महिला कोटाबाट लक्ष्मी आचार्य, दलित कोटाबाट हरिश विक, मधेशी कोटाबाट अनिल मिश्र र आदिवासी जनजाति कोटाबाट बुद्ध लोप्चन निर्विरोध निर्वाचित भए ।
सचिवहरूमा खुला कोटाबाट सुरेन्द्र चालिसे र सन्तोष देउजा, महिला कोटाबाट अञ्जली थापा र समावेशी कोटाबाट अवतार राई निर्वाचित भए । प्रदेश अनुसारका सचिवहरूमा प्रदेश १ बाट दीपेन्द्रकुमार राई, मधेशबाट सुनिता बराल, बागमतीबाट मीनकुमार दाहाल, गण्डकीबाट दीपक भट्टराई, लुम्बिनीबाट मानसिंह विक, कर्णालीबाट गाणेशकञ्चन भारती र सुदूरपश्चिमबाट राजेन्द्र अवस्थी निर्विरोध निर्वाचित भए । यसका साथै उपत्यका प्रदेशबाट नवराज दाहाल, प्रतिष्ठान प्रदेशबाट केशव भुल र एसोसियट प्रदेशबाट नन्दलाल तिवारी पनि निर्विरोध चयन भए ।
कोषाध्यक्षमा वसन्त गिरीले डा. डक्टप्रसाद धिताललाई १४८ मतको अन्तरले पराजित गरे । गिरीले ३३५ मत प्राप्त गरेका थिए भने धितालले १८७ मत पाए ।
प्रेस सेन्टरको २९ जना पदाधिकारीमध्ये १२ पदमा प्रतिस्पर्धा भएको थियो भने १७ जना निर्विरोध निर्वाचित भए । लेखा समितिको संयोजकमा अमृतराज तिवारी र सचिवमा भीम राई तथा अनुशासन समितिको संयोजकमा गुनाराम घिमिरे र सचिवमा कृष्ण लेकाली निर्विरोध चयन भए।
प्रेस सेन्टर नेपालको पाँचौँ महाधिवेशनको उद्घाटन पूर्व प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल प्रचण्डले शनिबार गरेका थिए।
प्रेस सेन्टर नेपालको आयोजक समिति, प्रदेश पदाधिकारी, जिल्ला अध्यक्ष, प्रतिनिधि र बाह्य मोर्चाका गरेर ८२१ जना प्रतिनिधि रहेकोमा ६७ प्रतिशत अर्थात् ५५१ मत खसेको थियो ।
