मिडिया एक्सन नेपाल आधिकारिक रूपमा सूचना तथा लोकतन्त्रसम्बन्धी अन्तर्राष्ट्रिय नागरिक संस्थाहरुको सञ्जाल 'कोलिसन अन इन्फर्मेसन एंड डेमोक्रेसी' मा सामेल भएको छ ।
सन् २०२१ मा 'फोरम अन इन्फर्मेसन एंड डेमोक्रेसी 'एफआइडि' को नेतृत्वमा स्थापना भएको यस सञ्जालले मिडिया एक्सन नेपालसहित विश्वभरका ६५ वटा नागरिक संस्थाहरूलाई सामेल गरको हो ।
नेपालबाट सञ्जालमा प्रवेश गर्ने पहिलो नागरिक संस्थाको रूपमा मिडिया एक्सन नेपाललाई स्वागत गर्दै सञ्जाल तथा एफआइडिका कार्यकारी निर्देशक क्यामिली ग्रेनियरले खुसी व्यक्त गरे ।
"हामी सूचना तथा लोकतन्त्रको लागि गठित सञ्जालमा मिडिया एक्सन नेपाललाई स्वागत गर्न पाउँदा खुसी छौं," ग्रेनियरले भने, "अभिव्यक्ति स्वतन्त्रता र सूचना प्राप्तिको अधिकार प्रवर्द्धन गर्ने मिडिया एक्सन नेपालको प्रतिबद्धता, विश्वव्यापी सूचना तथा सञ्चार क्षेत्रमा लोकतान्त्रिक सुरक्षाका उपायहरू कार्यान्वयनका लागि हाम्रो सामूहिक प्रयाससँग मेल खान्छ।" हामी सँगसँगै लोकतान्त्रिक मूल्यहरूलाई प्रवर्द्धन गर्न तथा विश्वभर सूचना अखण्डताको रक्षा गर्न निरन्तर लागिरहनेछौं ।"
सञ्जालको सदस्य भएपछि मिडिया एक्सन नेपालका संस्थापक तथा कार्यकारी निर्देशक लक्ष्मणदत्त पन्तले लोकतन्त्र र सूचना अखण्डतासम्बन्धी अन्तर्राष्ट्रिय छलफललाई थप समृद्ध बनाउने बताए ।
"मिडिया विकासलाई प्रवर्द्धन गर्ने र प्रेस स्वतन्त्रताको रक्षा गर्ने गहिरो प्रतिबद्धता बोकेको संस्थाका रूपमा हामी यस विश्वव्यापी सञ्जालमा सामेल हुन पाउँदा सम्मानित महसुस गरेका छौं," कार्यकार निर्देशक पन्तले भने, "नेपाल र दक्षिण एसियाबाट हाम्रा अनुभव तथा दृष्टिकोणले लोकतन्त्र र सूचना अखण्डतासम्बन्धी अन्तर्राष्ट्रिय छलफललाई थप समृद्ध बनाउनेछ ।"
मिडिया विकास तथा प्रेस स्वतन्त्रतासम्बन्धी विभिन्न पहलहरूको नेतृत्व गर्दै आएको मिडिया एक्सन नेपाल मिडिया फ्रीडम कोलिसन -कन्सलटेटिभ नेटवर्क, आकोस अलाइन्स तथा ग्लोबल फोरम फर मिडिया डेभलपमेन्ट जस्ता विश्वव्यापी सञ्चार विकास तथा प्रेस स्वतन्त्रताको क्षेत्रमा सक्रिय सञ्जालहरुको सदस्य हो ।
सन् २०२२ देखि २०२४ सम्म यस संस्थाका सस्थापक तथा कार्यकारी निर्देशक पन्तले मिडिया फ्रीडम कोलिसन -कन्सलटेटिभ नेटवर्कमा निर्वाचित सह-अध्यक्षका रूपमा प्रेस स्वतन्त्रको विश्वव्यापी प्रयासमा उल्लेखनीय योगदान पुर्याइसकेका छन् ।
