सार्वजनिक सेवा प्रसारण संस्था (पीएसबी) को सञ्चालक समितिको कार्यकारी अध्यक्षमा डा. महेन्द्र विष्ट नियुक्त भएका छन् । गत शुक्रबार बसेको मन्त्रिपरिषद् बैठकले डा. विष्टलाई पीएसबीको कार्यकारी अध्यक्ष नियुक्त गर्ने निर्णय गरेको थियो ।
नवनियुक्त कार्यकारी अध्यक्ष विष्टलाई सञ्चार तथा सूचना प्रविधि मन्त्री पृथ्वी सुब्बा गुरुङले पद तथा गोपनीयताको शपथ गराएका छन्।
सार्वजनिक सेवा प्रसारण संस्थाको सञ्चालक समितिको अध्यक्ष पदमा नियुक्तिका लागि नाम सिफारिस गर्न गठित समितिले विष्ट सहित १० जनाको नाम सिफारिस गरेको थियो ।
समितिले विष्टसहित दीपक पाठक, चिन्तामणि बराल, केदारनाथ कोइराला, सुवोध गौतम, शालिग्राम सुवेदी, रमेशकुमार खड्का, लक्ष्मण हुमागाईं, भुवनराज भट्ट र अच्युतमकुमार पोखरेललाई सिफारिस गरेको थियो ।
डा. महेन्द्र विष्टले नेपाल पत्रकार महासंघको अध्यक्ष, नेपाल टेलिभिजनको अध्यक्ष र न्यूनतम पारिश्रमिक निर्धारण समितिको अध्यक्षको जिम्मेवारीमा रहेर काम गरिसकेका छन् ।
