नेपाल रिपब्लिक मिडिया लिमिटेडले रिपब्लिका दैनिकको प्रधान सम्पादकमा प्रकाश रिमाललाई नियुक्त गरेको छ । रिमालले असोज ३० गते बुधबारदेखि रिपब्लिक मिडियाको अंग्रेजी दैनिकको प्रधान सम्पादकको कार्यभार सम्हालेका हुन् ।
रिपब्लिक मिडियाले भने औपचारिक रुपमा यसको घोषणा गरिसकेको छैन । रिपब्लिक मिडियाकी प्रमुख कार्यकारी अधिकृत (सिइओ) समृद्धि ज्ञवालीले कतिपय कानुनी प्रक्रियाहरू बाँकी नै रहेकाले प्रधान सम्पादक नियुक्तिको घोषणा नगरिएको प्रतिक्रिया दिइन् ।
"हामी पब्लिक लिमिटेड कम्पनी भएकाले कतिपय कानुनी प्रक्रियाहरू बाँकी छन्", ज्ञवालीले भनिन्, "बाँकी प्रक्रियाहरू सकिएलगत्तै हामी औपचारिक घोषणा गर्छौँ ।"
रिमालले पनि कतिपय प्रक्रियाले औपचारिकता पाउन बाँकी रहेको जानकारी दिए । रिपब्लिका दैनिक कोभिड महाव्याधिपछि २०७७ वैशाख ४ गतेदेखि इपेपरमा र अनलाइन संस्करणमा सीमित छ ।
बिहीबारको इपेपरको प्रिन्टलाइनमा भने सम्पादकमा कोशराज कोइरालाकै नाम छ । रिमाल नियुक्तिकै सुरुका दिन नेपाल रिपब्लिक मिडिया लिमिटेड र न्युयोर्क टाइम्सबीच संयुक्त डिजिटल सब्स्क्रिप्सन घोषणा कार्यक्रममा नागरिक दैनिकका प्रधान सम्पादक गुणराज लुइँटेलसँगै मञ्चमा देखा परेका थिए ।
रिमाल यसअघि नेपालमिनटका सम्पादक थिए । तीन दशकदेखि नेपालका ठूला समाचार कक्षमा सम्पादकीय नेतृत्त्वमा रहेका रिमालसँग द हिमालयन टाइम्स अंग्रेजी दैनिक, द काठमान्डू पोस्ट, कान्तिपुर एफएम आदिमा काम गरेको अनुभव छ । उनले सन् १९८८ मा स्पार्क म्यागेजिनमा रिपोर्टरबाट पत्रकारिता करिअर सुरु गरेका थिए । त्यसपछि उनले लामो समय द राइजिङ नेपालमा पनि काम गरे ।
के अब रिपब्लिकाको छापा पनि पुनः सुचारु हुन्छ ? रिमालले तत्काल केही भन्न नसकिने बताए । "वित्तीय अवस्था, टिम सबैकुराको व्यवस्थापन गर्नुपर्ने हु्न्छ", रिमालले मिडिया कुराकानीसँग भने, "अहिले केही भनिहाल्न सकिन्न ।"
सिइओ ज्ञवालीले रिपब्लिका दैनिक अहिले पनि न्युयोर्क टाइम्ससँगै कम्प्लिमेन्ट्रीका रुपमा ४ पृष्ठ प्रकाशित भइरहेको जानकारी दिइन् । "चार पृष्ठलाई नियमित ८ वा १२ पृष्ठ बनाउने नबनाउने कुरा कन्टेन्टमा भर पर्छ, हामी निर्णयमा पुगिसकेका छैनौँ", उनले भनिन् ।
नेपाल रिपब्लिक मिडियाले सन् १७ अक्टोबर २०१४ देखि न्युयोर्क टाइम्स पनि प्रकाशन गरी वितरण गर्दै आएको छ ।
