अनलाइन सञ्चार माध्यम सञ्चालन गर्ने योजनामा हुनुहुन्छ ? हामी तपाईँलाई सञ्चार तथा सूचना प्रविधि मन्त्रालय अन्तर्गतको सूचना तथा प्रसारण विभागमा अनलाइन मिडिया कसरी दर्ता हुन्छ भन्ने जानकारी दिँदैछौँ ।
आवश्यक कागजातहरू के के हुन् ?
अनलाइन सञ्चारमाध्यम निर्देशिका, २०७३ अनुसार अनलाइन मिडिया दर्ता गर्नका लागि निम्न कागजात आवश्यक पर्छ ।
१. Domain Name स्पष्ट खुल्ने गरी अनलाइन पत्रिका दर्ता गरिपाउँ भन्ने निवेदन,
२. कम्पनी दर्ता प्रमाणपत्रको प्रतिलिपि, साथै १ वर्ष नाघेका कम्पनीको कम्पनी अध्यावधिक पत्र, Audit Report र शेयर लगत परिवर्तन भएमा सो को विवरणसमेत,
३. अनलाइन पत्रिका सञ्चालन गर्ने उद्देश्यसहितको कम्पनीको प्रबन्धपत्र र नियमावली, (घरेलु तथा साना उद्योगमा दर्ता भएकोमा समेत अनलाइन पत्रिका सञ्चालन गर्ने उद्देश्य हुनुपर्नेछ) (पत्रिकाको हकमा पत्रिका स्थायी दर्ता प्रमाणपत्र र अनलाइन पत्रिका सन्चालन गर्ने भनी जिल्ला प्रशासन कार्यालयको सिफारिस पत्र)
४. कम्पनीका सबै सञ्चालनको नागरिकताको प्रतिलिपि
५. कम्पनी सञ्चालक समितिको बैठकको निर्णयको प्रतिलिपि (माइन्यूट),
माइन्यूट अन्तर्गत निम्न विषयको निर्णय हुनुपर्छ
क. Domain name खुल्नेगरी अनलाइन सञ्चारमाध्यम सञ्चालन गर्ने निर्णय,
ख. दुई वा सो भन्दा बढी सञ्चालक रहेको अवस्थामा एकजनालाई अनलाइनको सञ्चालक तोकिएको निर्णय,
ग. सम्पादक नियुक्तिको निर्णय,
घ. अनलाइनलाई सूचना तथा प्रसारण विभागमा दर्ता गर्ने निर्णय
६. सम्पादकको नागरिकताको प्रतिलिपि, नियुक्तिपत्र र SLC/SEE देखि Bachelor सम्मका सबै Certificate (Character Certificate सहित) वा यस विभागबाट सम्पादक भनी प्रमाणित गरिएको पत्रको प्रतिलिपी । (नोट: विदेशमा अध्ययन गरेकाको हकमा प्रत्येक तहका लागि नेपाल सरकारबाट मान्यता तथा समकक्षता निर्धारण गरिएको पत्र समावेश गर्नुपर्नेछ)
७. व्यवसायका कारोबारमा छपाई वा विद्युतीयस्वरुप, इन्टरनेटसमेतबाट प्रकाशन (कोड नं. ५८१३-०३) उल्लेख भएको स्थायी लेखा नम्बर/मूल्यअभिवृद्धि कर प्रमाणपत्रको प्रतिलिपि,
८. Public Domain Details (whois.com/godaddy.com) को प्रतिलिपि
Public Domin Details मा निम्न कुरा अनिवार्य समावेश हुनुपर्छ
- Domain Update रहेको देखिनुपर्ने,
- Domain को Registrant & Administrative Contact मा Name मा सञ्चालकको नाम, Organization मा कम्पनीको नाम र ठेगाना, फोन नम्बर र इमेल लगायतका विवरण देखिने हुनुपर्नेछ ।
९. अनलाइनको दरबन्दी विवरण, श्रमजीवी विवरण र प्रतिवद्धता पत्र, (नोट: कम्तीमा ३ जना श्रमजीवी र न्यूनतम तलब १७,६२५ हुनुपर्नेछ )
१०. पाँच जनासम्म श्रमजीवी विवरण रहेकोमा खाता विवरण तथा पाँच जना भन्दा बढी श्रमजीवी रहेकोमा बैङ्किङ प्रणालीबाट पारिश्रमिक भुक्तानी गरेको प्रमाणित प्रतिलिपि,
नियुक्ति पत्र,दरबन्दी विवरण, प्रतिवद्धता पत्र र खाता विवरण सूचना विभागको वेबसाइटमा भएको नमूना बमोजिम नै हुनुपर्ने छ ।
माथि उल्लेखित कागजातहरू सक्कल भए धेरै राम्रो । यदि प्रतिलिपि कागजात स्क्यान गरेर पठाउनुहुन्छ भने प्रतिलिपि कागजातलाई नोटरी मार्फत प्रमाणित गर्नुपर्ने छ ।
अब लागौँ कसरी दर्ता गर्ने तर्फ ।
Step-1: सूचना विभागको वेबसाइटमा जानुहोस् ।
Step-2: वेबसाइटमा गएर अनलाइन सेवा छनोट गर्नुहोस् ।
Step-3: अनलाइन सेवाभित्र अनलाइन सञ्चारमाध्यम छनोट गर्नुहोस् ।
Step-4: Registration Type मा New Registration छनोट गर्नुहोस् ।
Step-5: सञ्चालकको Photo and Signature Upload गरी Online Form मा Domain and Email बाहेक सबै विवरण नेपालीमा भर्नुहोस् ।
Step-6: आवश्यक कागजातहरूको 2 mb सम्मको pdf file बनाएर तोकिएको स्थानमा अपलोड गर्नुहोस् ।
Step-7: सबै कागजातहरू अपलोड गरी submit गरेपछि Confirmation Number प्राप्त हुन्छ सो number लाई सुरक्षित राख्नुहोस् ।
यति गर्नुभएपछि तपाईँको कागजात सूचना विभागका अधिकारीले जाँच गर्ने छ । अधिकारीले जाँच गर्दा तपाईँको कागजात नमिलेको खण्डमा Approve हुँदैन । तर Approved भन्ने सूचना आएपछि मात्रै अनलाइनका सञ्चालक २ वटा फोटो लिएर विभागमा अनलाइन दर्ता प्रमाणपत्र लिन जानुपर्छ ।
यदि तपाईँलाई दर्ताका क्रममा केही समस्या भएमा सूचना विभागको फोन नम्बर ०१-४११२६५२ मा सम्पर्क गर्न सक्नुहुने छ ।
