सिधा कुराले 'डार्क फाइल' भन्दै सार्वजनिक गरेको अडियो नक्कली रहेको प्रमाणित भएसँगै सिधाकुरा डटकमका अध्यक्ष र सम्पादकसहित तीन जनाविरूद्ध मुद्दा दायर भएको छ ।
सरकारी वकिलको कार्यालय काठमाडौंले सिधाकुराका अध्यक्ष तथा प्रस्तोता युवराज कँडेल, कार्यकारी सम्पादक नवीन ढुंगाना र राजकुमार तिमल्सीना विरूद्ध काठमाडौं जिल्ला अदालतमा मुद्दा दायर गरेको हो ।
उनीहरू तीनै जनाविरूद्ध विद्युतीय (इलेक्ट्रोनिक) कारोबार ऐन अन्तर्गतको र अपमानजनक व्यवहार सम्बन्धी कसुरमा मुद्दा दायर गरेको हो ।
सिधाकुराले डार्क फाइल भन्दै अडिओसहित समाचार प्रकाशन गरेको थियो । उक्त अडियो तिमल्सीनाले उपलब्ध गराएको भनिएको थियो । तीनै जनालाई फरार प्रतिवादी बनाएर मुद्दा अदालतमा पेस भएको छ।
सर्वोच्च अदालतले गत वैशाख २३ गते आदेश गरेपछि केन्द्रीय अनुसन्धान ब्युरो (सिआइबी)ले डार्क फाइलको अडियो प्रकरणमा छानबिन गरेको थियो । सिआइबीले अडियोमाथि अनुसन्धान गरी उक्त अडियो नक्कली रहेको प्रमाणित गरेको थियो ।
