टक्सार म्यागेजिनका प्रधान सम्पादक गजेन्द्र बुढाथोकीलाई नेपालका लागि चिनियाँ राजदूत छेन् सोङले धम्की दिएका छन् । पत्रकार बुढाथोकीले पोखरा विमानस्थल निर्माणका लागि लिइएको ऋण सम्बन्धमा सामाजिक सञ्जाल ‘एक्स’मा गरेको एउटा पोस्टमा राजदूत सोङले धम्की दिएका हुन् ।
सामाजिक सञ्जाल 'एक्स'मा पत्रकार बुढाथोकीले दुई दिनअघि ‘पोखरा विमानस्थलका लागि लिएको ऋण २ प्रतिशत ब्याजदरको भन्दै आएका थिए । ५ प्रतिशत पो रहेछ’ भन्दै पोस्ट गरेका थिए ।
सोही पोस्टमा राजदूत सोङले 'अहिलेसम्म आफूले देखेको सबैभन्दा ठूलो झुट' भन्दै मंगलबार राति रिप्लाई गरेका थिए । उनले लेखेका छन्, ‘यो सार्वजनिक सूचना हो, तैपनि यसबारे झुट बोल्ने आँट गर्नुभयो ।’
बुढाथोकी र उनले प्रतिनिधित्व गर्ने (व्यक्ति/संस्था) बाट पनि औपचारिक माफी माग्नुपर्ने माग समेत सोङले गरेका छन् ।
पत्रकार बुढाथोकीले उक्त विमानस्थलका लागि लिईएको ऋणको ब्याज, सेवा शुल्क र शुल्क सहित, कुल खर्च लगभग ५ प्रतिशत हुने अनुमान गरिएको भन्दै लेखेका छन, “मिडिया प्रतिनिधिको हैसियतमा तथ्यलाई वस्तुनिष्ठ रूपमा प्रस्तुत गर्नु महत्त्वपूर्ण हुन्छ। म कूटनीतिज्ञ वा नेपाल सरकारको आधिकारिक प्रतिनिधि होइन, त्यसैले राजदूतबाट धम्की असहनीय छ।”
बुढाथोकीले आफूले प्रमाणसहित आफूले म्यागेजिन(टक्सार म्यागजिन)मा प्रकाशित गर्ने पनि बताएका छन् । पोखरा विमानस्थल निर्माण गर्न नेपाल सरकारले चीनको एक्सपोर्ट इम्पोर्ट बैंकबाट आरएमबी १ अर्ब ३७ करोड ८७ लाख ऋण प्राप्त गरी ५ प्रतिशत ब्याज तिर्ने गरी नेपाल नागरिक उड्डयन प्राधिकरणलाई उपलब्ध गराएको छ ।
बुढाथोकीले धम्की नदिन र आफ्नो सीमामा बस्न पनि राजदूतलाई सुझाव पनि दिएका छन् । "एउटा पत्रकारले लेखेको विषयमा उहाँ जसरी प्रस्तुत हुनुभयो, यो सरासर धम्की हो", बुढाथोकीले मिडिया कुराकानीसँग भने, "एउटा देशको राजदूतले गरेको यो कार्य अमर्यादित छ । यस विषयमा म सप्रमाण लेख्दै पनि छु ।" उनले नेपाल सरकारको आधिकारिक दस्तावेजमा ५ प्रतिशत ब्याज भनिएको भन्दै अर्को ट्विट पनि गरेका छन् ।
यो एक झलक हो, नेपाल सरकारकै आधिकारिक निकायको दस्तावेजमै ५ प्रतिशत ब्याज भनेर लेखेको छ । यसका अरु विवरण खोज्दैछु ।
— Gajendra Budhathoki ♿ (@gbudhathoki) May 29, 2024
पोखरा विमानस्थल बनाउनका लागि ५ प्रतिशतका ब्याजदरमा ऋण लिएको हो । pic.twitter.com/PHyxVZPlz3
यस विषयलाई लिएर सामाजिक सञ्जाल तरंगित बनेको छ । राजदूतको सामाजिक सञ्जालमा आलोचना भएको छ ।
सामाजिक सञ्जालमा पक्षविपक्ष देखिएपनि अधिकांशले चिनियाँ राजदूतको भनाई कुटनीतिक मर्यादा विपरीत भएको बताएका छन्। भारतीय वा अमेरिकी राजदूतले यस्तै गरेको भए के हुन्थ्यो भन्ने प्रश्न समेत कयौँले गरेका छन्।
