नेपाल पत्रकार महासंघले गत वर्ष २०८० नेपाली पत्रकारिता क्षेत्रका लागि चुनौतीपूर्ण वर्ष रहेको जनाएको छ । नयाँ वर्ष २०८१ का अवसरमा प्रेस विज्ञप्ति जारी गर्दै महासंघका महासचिव रोसन पुरीले २०८० मा प्रेस स्वतन्त्रता हननका ६४ वटा घटना भएको जनाएका छन् ।
महासंघमा पत्रकारलाई समाचार प्रकाशन प्रसारण भएकै कारण धम्की तथा दुर्व्यवहार गर्ने, आक्रमण गर्ने, गिरफ्तारी गर्ने, सूचना संकलनमा अवरोध गर्ने जस्ता घटना महासंघमा अभिलेख भएका छन् । २०७९ सालमा प्रेस स्वतन्त्रता हननका ५१ वटा घटना भएका थिए भने २०७८ मा ७४ घटना भएका थिए ।
महासचिव पुरीले समग्र पत्रकारिता क्षेत्रमा विभिन्न खालका चुनौती आइपरेको विज्ञप्तिमा उल्लेख गरेका छन् । 'विश्वव्यापी रुपमा देखिएको आर्थिक संकट, प्रविधि र माध्यमको विकाससँगै समग्र पत्रकारिता क्षेत्रमा नयाँ नयाँ चुनौती देखिएका छन्', विज्ञप्तिमा भनिएको छ, 'महासंघमा दर्ता भएका श्रम समस्याहरू विस्तारै हल हुँदै गएपनि श्रमको दीर्घकालीन समस्या समाधानमा अबका वर्षमा मुख्य ध्यान दिनुपर्ने आवश्यकता छ ।' सञ्चार क्षेत्रमा देखिएको गम्भीर खालको आर्थिक संकटसँग जुध्ने र प्रविधिलाई आत्मसात गरेर अगाडि बढ्नुपर्ने चुनौती रहेको विज्ञप्तिमा उल्लेख छ ।
'प्रेस तथा अभिव्यक्ति स्वतन्त्रताका घटना गत वर्षको तुलनामा बढेका छन् । आम सञ्चार नीतिलाई कार्यान्वयन गर्न बन्नुपर्ने कानुनी मस्यौदा अपेक्षाकृत अगाडि बढ्न सकेका छैनन् । तीनवटै तहका सरकारले बनाएका र बनाउने कानुन प्रेस तथा अभिव्यक्ति स्वतन्त्रता मैत्री बनाउन थप दबाब दिन आवश्यक छ', विज्ञप्तिमा भनिएको छ ।
महासंघले वैशाख २१ र २२ गते लुम्बिनीमा हुने महाधिवेशनलाई पत्रकारितामा देखिएको सङ्कटका विषयमा केन्द्रित गरेको छ । पत्रकारिता क्षेत्रमा देखिएको संकटका विषयमा गम्भीर छलफल गर्ने र त्यसका निष्कर्षलाई कार्यान्वयन गर्ने महासंघको योजना छ ।
२०८० मा श्रमजीवी पत्रकारले तलब नपाएर विभिन्न सञ्चार गृहमा आन्दोलन गर्नुपरेको उल्लेख गर्दै पत्रकारको पेशागत सुरक्षा, श्रमजीवी पत्रकार ऐनलगायतका कानुन कार्यान्वयनको प्रत्याभूति गर्न महासंघले माग गरेको छ ।
