शिक्षा पत्रकार समूहले तीर्थराज भुसालको स्मृतिमा स्थापित उत्कृष्ट पत्रकारिता पुरस्कार पत्रकार श्रीधर पौडेललाई प्रदान गरेको छ ।
नेपालको सार्वजनिक शिक्षा सुधारका लागि विगत दुई दशकदेखि पत्रकारिताको माध्यमबाट योगदान पुर्याएको ठहर गर्दै एडुखबर डटकमका सम्पादक पौडेललाई पुरस्कृत गरिएको हो ।
समूहको रजत वर्षका अवसरमा आयोजित कार्यक्रममा शिक्षा विज्ञान तथा प्रविधि मन्त्री अशोक राईले पौडेललाई नगद ३५ हजार र प्रमाणपत्र प्रदान गरे ।
समूहले सिर्जनशील शिक्षक सम्मान राष्ट्रिय आधारभूत विद्यालय माडी नगरपालिका ३ रतनीकी मिल्सना महतोलाई प्रदान गरिएको छ ।
उत्कृष्ट प्रधानाध्यापक सम्मान इलामको सूर्योदय नगरपालिका ११ माघेको भवानी आधारभूत विद्यालयका प्रधानाध्यापक रचना देवानलाई प्रदान गरेको छ । ०७७ मंसिरमा ८ जना विद्यार्थी रहेको यो विद्यालयमा अर्को विद्यालयमा गाभ्ने अवस्थामा पुगेकोमा अहिले पर्याप्त विद्यार्थी भएको,धुलोरहित कक्षाकोठा बनाउन सफल भएको भन्दै उनलाई सम्मान गरिएको हो ।
उत्कृष्ट विद्यालय व्यवस्थापन समिति अध्यक्षमा काठमाडौँको गागलफेदी स्थित सिद्धि गणेश माध्यमिक विद्यालयका व्यवस्थापन समिति अध्यक्ष राजकुमार थापालाई प्रदान गरेको छ ।
समूहले उत्कृष्ट स्थानीय तह सम्मान बर्दियाको ठाकुरबाबा नगरपालिकालाई प्रदान गरेको छ । नगरपालिकाले निःशुल्क शिक्षाको अभ्यास गरेको, तहगत र विषयगत शिक्षकको दरबन्दी मिलान, ५ वर्ष समयावधि पुगेका शिक्षकलाई अर्को विद्यालयमा सरुवा, नगरपालिकाको कुल बजेटको ३४.२ प्रतिशत बजेट छुटाएर उदाहरणीय कार्य गरेकोले उत्कृष्ट नगरपालिकाको सम्मान गरिएको समूहका अध्यक्ष कृष्ण मल्लले जानकारी दिए ।
