कार्टुनिस्ट रवि मिश्रको एकल कार्टुन प्रदर्शनी हुने भएको छ । काठमाडौंको नयाँ बानेश्वरस्थित एनबी सेन्टरमा रहेको उमोजा क्याफेमा बिहीबारदेखि ‘डिपिक्सन’ शीर्षकमा १० दिने एकल प्रदर्शनी हुन लागेको हो ।
१७ वर्षदेखि कार्टुन विधामा काम गरेका मिश्रका विभिन्न अखबार तथा म्यागजिनहरूमा करिब ३ हजार कार्टुन प्रकाशित छन् । एकल प्रदर्शनी भने मिश्रको पहिलो हो ।
हाल उनी नयाँ पत्रिका दैनिकमा कार्यरत छन् । पत्रपत्रिकामा प्रकाशित भएका कार्टुनमध्ये छानिएका केही कार्टुन प्रदर्शनीमा राख्न लागेको उनले बताए ।
"प्रदर्शनीलाई मैले 'डिपिक्सन’ नाम दिएको छु", मिश्रले भने, "डिपिक्सन मैले देखेको नेपाली समाजको चित्र हो,जहाँ समाजमा हुने बेथिति विसंगति र कुशासनलाई व्यङ्ग्यात्मक रुपमा चित्रण गरिएको छ ।"
कार्टुनलाई सञ्चार मात्रै नभएर संवाद पनि बनाउन प्रदर्शनीको आवश्यकता परेको उनले बताए । "पत्रिकाको माध्यमबाट एकोहोरो संवाद गरिरहेको म यो प्रदर्शनीमार्फत दोहोरो संवाद गर्न खोज्दै छु”, उनले भने, “कार्टुन एकतर्फी सञ्चार मात्र होइन, संवाद पनि हो भन्ने मेरो विश्वास छ।"
बिहीबारदेखि सुरु हुने प्रदर्शनी माघ १३ गतेसम्म जारी रहने छ ।
