प्रेस काउन्सिल नेपालले भूकम्प लगायत विपद्को समाचार सामग्री सम्प्रेषणमा सम्वेदनशीलता अपनाउन सञ्चारमाध्यमहरूलाई आग्रह गरेको छ । काउन्सिलले शनिबार विज्ञप्ति जारी गरी पहिलो हुने होडबाजीमा आधिकारिक तथ्य पुष्टिबेगर मानवीय संवेदनामा खलल पुग्ने सामग्री सम्प्रेषण नगर्न भनेको हो ।
"...विपत्ति वा शोकमा परेका व्यक्ति वा आफन्तजनमा थप पीडा पुग्ने गरी, मृतक तथा घाइतेको वीभत्स दृश्य र तस्बिर सम्प्रेषण नगर्न/नगराउन र मृतक एवं घाइतेको विवरण प्रस्तुत गर्दा संवेदनशील भइ गोपनीयताको सम्मान गर्न" काउन्सिलले आम सञ्चार माध्यम, पत्रकार, सञ्चारकर्मी, युट्युबलगायतका सामाजिक सञ्जाल र यसका प्रयोगकर्तामा आग्रह गरेको छ ।
"यस किसिमको विपद् एवं दैवीप्रकोपको समयमा आफ्नो कर्तव्य निर्वाह गर्नेक्रममा पत्रकार तथा सञ्चार माध्यम थप संवेदनशील हुनुपर्दछ", काउन्सिलको विज्ञप्तिमा भनिएको छ, "भूकम्पको सामग्री सम्प्रेषण गर्ने सिलसिलामा केही युट्युबलगायतका सामाजिक सञ्जाल र अनलाइन सञ्चार माध्यमबाट बीभत्स दृश्य तथा तस्बिरसहित तथ्यगत पुष्टिबेगर अतिरञ्जित हुने एवं पीडितलाई थप पीडा पुग्ने किसिमबाट सामग्री सम्प्रेषण भएकोप्रति प्रेस काउन्सिलको ध्यानाकर्षण भएको छ ।"
काउन्सिलले पत्रकार आचारसंहिता पनि स्मरण गराएको छ । काउन्सिलका सहप्रवक्ता रामशरण बोहोराद्वारा जारी विज्ञप्तिमा लेखिएको छ-
पत्रकार तथा सञ्चार माध्यमले “सत्यतथ्य र सन्तुलित सामग्री सम्प्रेषण गर्नुपर्ने, छिटो हुनेभन्दा तथ्यतर्फ सजग रहनुपर्ने, सामाजिक सञ्जालमार्फत सूचना तथा जानकारी प्रवाह गर्दा पनि तथ्यगत पुष्टिपश्चात मात्र सामग्री सम्प्रेषण गर्नुपर्ने, घृणा, सन्त्रास र उत्तजेना फैलाउने किसिमका बीभत्स दृश्य र तस्बिर सम्प्रेषण गर्न नहुने, सामग्रीको सत्यतामाथि प्रश्न उठ्नासाथ वा गल्ती भएको भए जानकारी हुनासाथ यथाशीघ्र क्षमायाचनासहित सच्याउनुपर्ने” पत्रकार आचारसंहिता, २०७३ (पहिलो संशोधन, २०७६) मा व्यवस्था छ ।
