नेपाल पत्रकार महासंघ केन्द्रीय समितिले कान्तिपुर पब्लिकेसन्स लिमिटेडस्थित आफ्नो शाखा निलम्बन गरेको छ ।
शुक्रबार बसेको महासंघको केन्द्रीय समिति बैठकले महासंघको नीतिविपरीत कार्य गरेको ठहर गर्दै महासंघको कान्तिपुर प्रतिष्ठान शाखा निलम्बन गर्ने निर्णय गरेको महासंघका महासचिव रोसन पुरीले जानकारी दिए ।
८२ जना पत्रकारहरूलाई गैरकानुनी ढंगले निष्कासन तथा सरुवा गर्ने कान्तिपुर व्यवस्थापनको निर्णयविरुद्ध कान्तिपुरका पत्रकार आन्दोलित भइरहँदा त्यहाँस्थित महासंघ शाखाले व्यवस्थापनको हीतमा सहमति गरेको आरोप लागेको थियो ।
यस्तै महासंघ केन्द्रले कान्तिपुर लगायतका सञ्चार माध्यममा देखिएको श्रम समस्याका बारेमा सञ्चार तथा सूचना प्रविधि मन्त्री रेखा शर्मालाई ध्यानाकर्षण गराइरहँदा महासंघको कान्तिपुर शाखाले त्यसलाई कान्तिपुर विरुद्ध दुश्प्रचार भनिरहेको थियो ।
व्यवस्थापनले महासंघविरुद्ध महासंघकै शाखालाई प्रयोग गरी लाञ्छित गर्न थालेपछि महासंघ केन्द्रीय समितिले गत कात्तिक १ गते कान्तिपुर शाखालाई स्पष्टीकरण सोधेको थियो । उक्त स्पष्टीकरणको जवाफ चित्त बुझ्दो नभएको भन्दै महासंघ केन्द्रले शाखा निलम्बनको निर्णय गरेको हो ।
यदि तपाईँलाई नेपालको प्रभावशाली मिडिया कान्तिपुरमा के भइरहेको छ भन्ने थाहा छैन भने कान्तिपुरको श्रम सङ्कटमाथि मिडिया कुराकानीको निगारानी पढ्नुहोस् ।
