कान्तिपुर पब्लिकेसन्स लिमिटेड पत्रकार/कर्मचारीलाई न्यूनतम अवकाश प्याकेज दिन तयार भएको छ । कान्तिपुर व्यवस्थापन र कान्तिपुरस्थित नेपाल पत्रकार महासंघ शाखाबीच आइतबार साँझ सहमति बनेको हो ।
कान्तिपुरले १० वर्षसम्म काम गरेका पत्रकारहरूलाई वार्षिक ५० हजार, २० वर्षसम्म काम गरेका पत्रकारहरूलाई वार्षिक ५५ हजार र २० वर्षभन्दा माथि काम गरेकालाई वार्षिक ६० हजारका दरले प्याकेज दिन तयार भएको हो ।
"हामीले अथक प्रयासपछि श्रम समस्यालाई एउटा सकारात्मक विन्दुमा पुर्याएका छौँ", नेपाल पत्रकार महासंघ, कान्तिपुर प्रतिष्ठान शाखाका अध्यक्ष अनिल गिरीले भने, "दशैँको मुखमा साथीहरूमाथि न्याय भएको छ ।"
कानुनअनुसार पाउनुपर्ने सेवासुविधा समेत नदिई पत्रकारहरूलाई निष्कासन गर्न खोजिएपछि त्यहाँस्थित नेपाल पत्रकार महासंघ प्रतिष्ठान शाखाले व्यवस्थापनसमक्ष १२ बुँदे माग राखेको थियो । महासंघ शाखा र कान्तिपुर व्यवस्थापनबीच विभिन्न चरणमा वार्ताहरू भएका थिए ।
दशैँको मुखमा पब्लिकेसन्स व्यवस्थापनले वर्षौँदेखि काम गरिरहेका ६८ जना पत्रकारहरूलाई इमेलमार्फत् अवकाश पत्र पठाएर रित्तै हात घर फर्काउन खोजेको थियो ।
कान्तिपुरका पत्रकार, नेपाल पत्रकार महासंघ र कान्तिपुरस्थित महासंघको शाखाले व्यवस्थापनको निर्णयविरुद्ध पहल लिएका थिए । श्रमजीवी पत्रकार संघसहित पत्रकारका अन्य संगठन, संस्थाहरूले समेत कान्तिपुरको श्रम समस्या सुल्झाउन पहल गरेका थिए ।
व्यवस्थापन र महासंघ शाखाबीच सहमति बनेको प्याकेज अस्वीकार गर्ने पत्रकारले कानुनी उपचारको बाटो समाएर श्रम अदालत जाने बाटो भने खुलै छ । कान्तिपुरका कतिपय पत्रकार यसअघि नै कानुनी उपचारको बाटोमा गइसकेका पनि छन् ।
"महासंघको पहलका कारण न्यूनतम सहमति बनेको हो । एकजना पनि पत्रकारले यसमा असहमति राखेर कानुनी उपचारको बाटोमा जान चाहनुभएमा हामी सहयोग गर्छौँ", नेपाल पत्रकार महासंघका महासचिव रोसन पुरीले भने, "सहमति कार्यान्वयनको अवस्था हेर्छौँ र आवश्यक पहल लिन्छौँ ।"
बाँकी तलब पनि यथाशीघ्र भुक्तानी गर्न कान्तिपुर सहमत भएको छ । "कान्तिपुरमा कार्यरत पत्रकारहरू स्वेच्छिक अवकासमा जान चाहेको खण्डमा बिदा, औषधी उपचार, उपदान लगायतका कानुनले तोकेका विषयमा काम गरेको वर्षका आधारमा एकमुष्ट प्याकेज उपलब्ध गराउने, जिल्लामा कार्यरत पत्रकारहरू अवकाशपछि पनि इच्छुक भएमा स्ट्रिन्जरका रुपमा काममा राखिने, बाँकी तलब यथाशिघ्र भुक्तानी गर्ने लगायतका सहमतिमा दुई पक्षबीच आइतबार हस्ताक्षर भएको छ", महासंघ कान्तिपुर शाखाको विज्ञप्तिमा उल्लेख छ ।
मुलुकको प्रभावशाली सञ्चार संस्था कान्तिपुर पब्लिकेसन्समा के भइरहेको छ थाहा पाउनुहोस् ।
- 'कान्तिपुर' मा के भइरहेको छ ? पछिल्ला ६ अपडेट
- मिडियाको श्रम समस्या सुल्झाउन सम्भव छ त संयुक्त संघर्ष समिति ?
- समाजवादी प्रेस संगठनले भन्यो- 'कान्तिपुर गैरजिम्मेवार, नैतिक दायित्वबाट पन्छियो'
- कान्तिपुरका पत्रकारमाथि व्यवस्थापनले गरेको अपमानको फेहरिस्त
- युनियन, चौतारी र सेन्टरको संयुक्त बोली - ‘कान्तिपुरको व्यवहार निन्दनीय’
- कसले गर्यो कान्तिपुरबारे ‘अलर्गल प्रचार’ ? महासंघ शाखाको विज्ञप्तिका सङ्केत र सन्देश
- कान्तिपुर व्यवस्थापनले पत्रकार महासंघको प्रतिष्ठान शाखालाई वार्तामा बोलायो
- कान्तिपुरबाट फोटो पत्रकारहरू निकालिएको भन्दै पीजे क्लबको विरोध
- कान्तिपुरको समस्या सुनेपछि सञ्चारमन्त्रीले भनिन्- आवश्यक परे क्याबिनेटमा प्रस्ताव लान्छौँ
- कान्तिपुर व्यवस्थापनलाई गल्ती सच्याउने अवसर, यस्ता छन् पत्रकारका १२ माग
- कान्तिपुर प्रकरणमा पत्रकार महासंघको चेतावनी- 'माग बेवास्ता गरे कडा संघर्ष'
- दशैँको मुखमा ६८ पत्रकारलाई कान्तिपुरको अवकाश पत्र
- पत्रकार महासंघको ठहर- कान्तिपुर व्यवस्थापनका काम ‘कानुनी व्यवस्थाविरोधी’
- ‘कान्तिपुर’ मा सल्किएको आगो
