पछिल्लो समय कान्तिपुर पब्लिकेसन्स् लिमिटेड सहितका सञ्चारमाध्यमहरूमा देखिएको श्रम समस्या समाधान गर्न सञ्चारसम्बद्ध संगठनहरूले संयुक्त संघर्ष समिति बनाउने तयारी थालेका छन् ।
असोज २१ गते आइतबार श्रमजीवी पत्रकार संघ, नेपालले गरेको ‘सञ्चार क्षेत्रका श्रम समस्या र समाधानको बाटो’ विषयक अन्तर्क्रिया कार्यक्रममा नेपाली सञ्चार जगतमा देखिएका समस्या समाधानका लागि सञ्चारसम्बद्ध संगठनहरूले संयुक्त समिति बनाउनुपर्ने बताए ।
श्रमजीवी पत्रकार संघ, नेपालका अध्यक्ष जन्मदेव जैसीले अन्तर्क्रियाको सुरुमै ‘सञ्चार क्षेत्रका श्रम समस्या र समाधानको बाटो’ विषयक संक्षिप्त कार्यपत्र प्रस्तुत गरे । कार्यपत्रमा केन्द्रित रहेर कान्तिपुर सहितका मिडियाबाट प्रभावित पत्रकारहरूले संगठित रूपमा श्रम समस्याको विरूद्धमा आन्दोलन गर्नपर्ने विचार राखे ।
उनीहरूले पत्रकारसँग सम्बन्धित संघ संस्थाहरूले श्रमजीवीहरूको मुद्दामा सहयोग नगरेको आरोप समेत लगाए । पत्रकारहरूको छाता संगठन नेपाल पत्रकार महासंघले चुनावको समयमा श्रमजीवी पत्रकारको मुद्दा उठाउने र नेतृत्वमा पुगेपछि मतलब नगरेको आरोप सहभागीहरूले लगाए ।
कान्तिपुरबाट प्रभावित पत्रकार तथा श्रमिकहरू शिवप्रसाद काफ्ले, दामोदर न्यौपाने, अनुप ओझा, टिकाराम प्रधान, पूर्व कान्तिपुरकर्मी श्यामकृष्ण पुडासैनी, पत्रकार ज्ञानु घिमिरे लगायतले सञ्चार क्षेत्रका श्रम समस्या र समाधानका लागि आन्दोलन एक मात्र विकल्प भएको धारणा राखे ।
कार्यक्रममा बोल्दै संघका कानुनी सल्लाहकार उमाकान्त न्यौपानेले कानुनको पालना नगर्ने मिडियालाई सरकारले कानुनको दायरामा ल्याउनैपर्ने बताए । “कानुनले भन्छ, ऐन कार्यान्वयन नगर्ने हाउसलाई ऐनको दफा ३३ (क) बमोजिम कच्चा पदार्थमा रोकावट, सरकारी सेवासुविधामा रोक लगाउने र वैदेशिक सद्भाव भ्रमणमा सहभागी नगराउने लगायतका कारबाहीको व्यवस्था छ तर किन हुँदैन ?” उनले प्रश्न गरे ।
कार्यक्रममा प्रेस सेन्टर, प्रेस चौतारी र समाजवादी प्रेस संगठनका पदाधिकारीहरूले पनि अहिले मिडियाहरूमा देखा परेको श्रम समस्याको विषयमा जागरूक रहेको र श्रमजीवीहरूको समस्यामा सधै साथ दिने एक्यवद्धता जनाए ।
प्रेस सेन्टरका महासचिव सन्तोष पौडेलले मिडियाका व्यवस्थापक, श्रमिक र संगठन यसखालको अन्तर्क्रियामा बस्नुपर्ने बताए । 'श्रमजीवी र पत्रकारको मुद्दामा हामी सबै संगठनहरू एक छौँ", उनले भने, “श्रमजीवीको पक्षमा सरकारले निर्णय गर्न सकेन भने सरकारको विरूद्धमा जान सेन्टर तयार छ ।"
प्रेस चौतारीका महासचिव हिरामान लामाले श्रम समस्याको विषयमा हाम्रो संगठन गम्भीर रहेको बताए । "श्रमजीवीहरूको समस्या छिटो समाधान हुनपर्छ", उनले भने, “श्रमजीवीहरूले गर्ने आन्दोलनमा प्रेस चौतारीको साथ छ र आन्दोलनमा उपस्थिति समेत रहन्छ ।"
पत्रकार महासंघ कोशी प्रदेशका उपाध्यक्ष लवदेव ढुंगानाले संघर्षका कार्यक्रम तय गरेर संयुक्त आन्दोलनका लागि सरोकारावालाहरू होमिन ढिला भइसकेको बताए ।
संघका अध्यक्ष जैसीले नेपाल पत्रकार महासंघ सहितको छुट्टै संघर्ष समिति बनाएर आन्दोलन गर्ने बताए । मिडियाहरूले वार्ताको माध्यमबाट समस्या समाधान गर्नुपर्छ भने पनि बिना आन्दोलन वार्ताको औचित्य नहुने विगतको अनुभव रहेको उनले सुनाए ।
