कान्तिपुर व्यवस्थापनले दशैँको मुखमा पत्रकारलाई अवकाश पत्र दिएपछि नेपाल पत्रकार महासंघले गम्भीर ध्यानाकर्षण भएको जनाएको छ । महासंघले आइतबार प्रेस विज्ञप्ति जारी गर्दै पत्रकारहरूलाई कानुनविपरीत अवकाश पत्र थमाउने कान्तिपुर मिडिया ग्रुपको कदमप्रति आपत्ति जनाएको हो ।
गत असोज ९ गते कान्तिपुरले ६८ जना पत्रकारहरूलाई इमेलमार्फत् अवकाश पत्र पठाएपछि त्यहाँस्थित महासंघको शाखाले व्यवस्थापनसमक्ष १२ बुँदे माग राखेको छ । कान्तिपुर प्रतिष्ठान शाखाले व्यस्थापन समक्ष राखेका मागहरूप्रति महासंघ केन्द्रले पनि पूर्ण समर्थन र ऐक्यवद्धता प्रकट गरेको छ ।
"श्रमजीवी पत्रकार ऐन, प्रचलित विधि र पद्धतिविपरीत पत्रकारलाई पेशाबाट निष्कासन गर्ने, कानुनविपरीत सरुवा गर्ने काम गर्ने, वातावरण नदिने र लामो समयको योगदानको अवमूल्यन गर्दै अपमानित गर्ने कार्य महासंघका लागि किमार्थ स्वीकार्य नहुने प्रष्ट पार्न चाहन्छौं", महासंघका वरिष्ठ उपाध्यक्ष रमेश विष्टद्वारा जारी विज्ञप्तिमा भनिएको छ ।
कान्तिपुरले प्रतिष्ठान शाखाले गत शुक्रबार समस्या समाधानका लागि व्यवस्थापनसँग १२ बुँदे माग पेस गरेको थियो । कान्तिपुरले सो मागलाई बेवास्ता गरे संघर्षमा उत्रिने चेतावनी पत्रकार महासंघले दिएको छ ।
"महासंघ केन्द्र र प्रतिष्ठान शाखाको माग र आग्रहलाई बेवास्ता गरिए प्रतिष्ठान शाखासमेतको समन्वयमा कडा संघर्षमा उत्रिन बाध्य हुने कुरा स्पष्ट पार्दछौँ", विज्ञप्तिमा उल्लेख छ ।
त्यस्तै महासंघले कान्तिपुरको श्रम समस्यालाई लिएर सरकार र जननिर्वाचित प्रतिनिधिहरूको संस्था संसद्को समेत ध्यानाकर्षण गराएको छ ।
पढ्नुस् महासंघको विज्ञप्तिः
