विज्ञापन बोर्डले विज्ञापन आचारसंहिता, २०७८ को मस्यौदा सार्वजनिक गरेको छ । सञ्चार तथा सूचना प्रविधि मन्त्री ज्ञानेन्द्र बहादुर कार्कीले विज्ञापन बोर्डले सोमबार गरेको कार्यक्रममा आचारसंहिता सार्वजनिक गरेका हुन् ।
एक महिनासम्म सरोकारवालाको राय प्रतिक्रिया लिई आचारसंहिताको मस्यौदालाई अन्तिम रूप दिने बोर्डले तयारी गरेको छ । विज्ञापन ऐन २०७६ जारी भएको दुई वर्ष पुरा भएको अवसरमा काठमाडौंमा आयोजित विज्ञापन दिवस तथा आचारसंहिताको मस्यौदा सार्वजनिकीकरण एवं अन्तरक्रिया कार्यक्रममा मस्यौदा सार्वजनिक गरिएको हो ।
आचारसंहिता सार्वजनिक गर्दै सञ्चार तथा सूचना प्रविधि मन्त्री कार्कीले विज्ञापन क्षेत्रलाई स्वच्छ पारदर्शी, व्यवसायिक र विकृति रहित बनाउन बनाउन आचारसंहिता सहयोगी हुने बताए । सरकारले विज्ञापन क्षेत्रलाई नियन्त्रण नभई नियमन गर्न चाहेको मन्त्री कार्कीले बताए । विज्ञापन गर्न रोक लगाइएका वस्तु तथा सेवाको विज्ञापन गर्ने प्रवृतिलाई रोक्नु पर्ने बताउँदै मन्त्री कार्कीले होर्डिङबार्ड र भित्ते लेखन जस्ता कुराले सहर र राजमार्गको सौन्दर्यतामा ह्रास आएको बताए ।
कार्यक्रममा सञ्चार तथा सूचना प्रविधि मन्त्रालयका सचिव डा. बैकुण्ठ अर्यालले व्यवसायीका समस्या समाधान गर्न मन्त्रालय तत्पर रहेको बताए । विज्ञापनरहित प्रसारणमा विकृति देखिन थालेको उनको भनाई छ । ऐन तथा कानुनले रोक लगायतका विषयमा विज्ञापन गर्ने गरिएकोले त्यसलाई नियन्त्रण गर्नुपर्ने उनले बताए । विज्ञापन व्यवसाय प्रतिष्पर्धात्मक हुनुपर्ने पनि उनको भनाई छ ।
विज्ञापन बोर्डका अध्यक्ष लक्ष्मण हुमागाईले विज्ञापन बोर्डले आचारसंहितालाई दुई महिना भित्र अन्तिम रुप दिने र आगामी वर्ष भित्र विज्ञापनको राष्ट्रिय नीति ल्याइने बताए । उनले विज्ञापनरहित प्रसारणमा कडाई गरिने होर्डिङ बोर्ड सम्बन्धी छुट्टै नियमावली ल्याउने र सञ्चारमाध्यम प्रति जनतामा रहेको प्रभाव पहुँचका आधारमा विज्ञापन दिने लिने संयन्त्रको विकास गरिने जानकारी दिए ।
नेपाल उद्योग वाणिज्य महासंघका अध्यक्ष शेखर गोल्छाले विज्ञापन बोर्डले गरेको प्रयासको सराहना गर्दै भविष्यमा निजी क्षेत्रसँग समन्वय गरी अघि बढ्न आग्रह गरे ।
मिडिया एलाइन्सका अध्यक्ष भाष्करराज राजकर्णिकारले सरकारी विज्ञापनका एकद्वार नीति र विज्ञापन बोर्ड मार्फत गर्ने गराउने ऐनको व्यवस्था कार्यान्वयनको माग गरे । डिजिटल मिडिया र सामाजिक, सञ्जालमा भइरहेको विज्ञापनमा रोक लगाउन उनले माग गरे ।
विज्ञापन संघ नेपालका अध्यक्ष सोमप्रसाद धितालले विज्ञापन बोर्डमा विज्ञापन संघको प्रतिनिधित्व सुनिश्चितता गर्न आग्रह गरे । विज्ञापन बोर्डका रचनात्मक काममा सहयोग गर्न संघ तयार रहेको भन्दै उनले विज्ञापनको आचारसंहिताको पालनामा विज्ञापन चक्रमा सहभागी सबैको सहयोग आवश्यक हुने बताए ।
कार्यक्रममा नेपाल पत्रकार महासंघका अध्यक्ष विपुल पोखरेलले साना संचारमाध्यमको हितको संरक्षण र पत्रकारहरुको सुरक्षामा जोड दिए ।
मंसिर ७ गतेसम्म प्राप्त सुझावलाई अध्ययन तथा समावेश गरी विज्ञापन आचारसंहितालाई अन्तिम रूप दिइने अध्यक्ष हुमागाईले जानकारी दिए ।
