के तपाईँलाई पड्कास्टमार्फत पत्रकारिता गर्न मन लागेको छ ? पड्कास्ट उत्पादनमा अनुभव छ ? यदि छ भने यो अवसर तपाईँका लागि हो ।
नेपालको अग्रणी सञ्चार संस्था कान्तिपुर मिडिया ग्रुपले 'सिनियर पड्कास्ट प्रोड्युसर' का लागि आवेदन आह्वान गरेको छ ।
रेडियो कान्तिपुरलाई परम्परागत 'टक-एन्ड-प्ले' शैलीबाट आधुनिक 'अन-डिमान्ड' अडियो प्लाटफर्म बनाउने रणनीतिका साथ कान्तिपुरले पड्कास्टर खोजेको जनाएको छ । परम्परागत प्रसारणको तालिकामा सीमित नभई श्रोताले आफ्नो सुविधा र समयमा रुचिको सामग्री सुन्न मिल्ने बनाउनु 'अन-डिमान्ड' हो ।
"यो पदको मुख्य जिम्मेवारी रेडियो कान्तिपुरको कार्यक्रम रणनीतिलाई पुनर्संरचना गर्नु हो । परम्परागत 'टक–एन्ड–प्ले' रेडियोलाई सहरी क्षेत्रका श्रोता, विदेशमा रहेका नेपाली र युवा पुस्तालाई आकर्षित गर्नेगरी अन–डिमान्ड अडियो सामग्री उत्पादन गर्नु हो," कान्तिपुरको आवेदनमा भनिएको छ, "यो जिम्मेवारीले संस्थाको प्रिन्ट, डिजिटल र ब्रोडकास्ट युनिटहरूलाई जोड्ने केन्द्रीय सम्पादकीय तथा उत्पादन हबको भूमिका निभाउनेछ ।"
यो पदमा छानिने व्यक्तिले कान्तिपुर दैनिक, काठमाडौं पोस्ट र रेडियोबीच सम्पादकीय पुलको काम गर्नुपर्नेछ ।
छापा माध्यमका समाचारलाई रोचक 'न्युज डिकोडर' अडियो सामग्रीमा बदल्ने तथा अनुसन्धानमूलक पोडकास्ट सिरिजहरूको नेतृत्व गर्ने जिम्मेवारी यो पदलाई छ । अडियो मिक्सिङ, साउन्ड डिजाइन र डिजिटल मार्केटिङको प्राविधिक दखल आवश्यक पर्ने जनाइएको छ ।
कान्तिपुरका अनुसार हाल यहाँ कार्यरत तथा नयाँ नियुक्त हुने पत्रकारहरूलाई 'डिजिटल-फर्स्ट' सोचतर्फ डोर्याउन सक्ने नेतृत्व क्षमता तपाईँमा हुन आवश्यक छ । साथै, Spotify र Apple Podcasts जस्ता पड्कास्ट प्लेटफर्महरूमा सामग्री व्यवस्थापन गर्ने ज्ञान पनि तपाईँमा आवश्यक पर्छ ।
आवेदनका लागि १५ अप्रिल २०२६ को समयसीमा तोकिएको छ । व्यक्तिगत विवरणसँगै आफूले बनाएका २-३ वटा उत्कृष्ट अडियो नमुना र आगामी ३ महिनाका लागि प्रस्तावित ३ वटा पोडकास्ट योजना (५०० शब्द) पठाउनुपर्ने जनाइएको छ ।
कान्तिपुरले यसअघि कान्तिपुर दैनिकका लागि प्रधान सम्पादक तथा कान्तिपुर तथा काठमाडौं पोस्टका लागि म्यानेजिक एडिटरका लागि पनि आवेदन आह्वान गरेको छ ।
कान्तिपुर मिडिया ग्रुपले आफ्नो सम्पादकीय संरचनामा व्यापक फेरबदल गर्दै सबै प्लाटफर्मको रेखदेख गर्ने गरी सर्वोच्च नेतृत्त्वमा अनुप काफ्लेलाई नियुक्त गरेको छ ।
