डिजिटल राइट्स नेपालले डिजिटल अधिकार र सुरक्षा सम्बन्धी हाते पुस्तिका सार्वजनिक गरेको छ । डिजिटल अधिकार तथा सुरक्षाका विषयमा नागरिकलाई सशक्तिकरण गर्ने हाते पुस्तिकाको उद्देश्य रहेको डिजिटल राइट्स नेपालले जनाएको छ ।
नागरिक, शिक्षक-शिक्षिका, नीति निर्माता तथा अभियन्ताहरूलाई अनलाइन स्पेसमा रहेका सुरक्षासम्बन्धी चुनौती वा जटिलताहरूलाई बुझाउने गरी पुस्तिका तयार पारिएको छ ।
पुस्तिकामार्फत् डिजिटल प्रविधिहरूको सुरक्षित प्रयोग गर्न आवश्यक सीप र उपयुक्त उपकरणहरूको बारेमा सचेतना फैलाउने लक्ष्य रहेको डिजिटल राइट्स नेपालका कार्यकारी निर्देशक सन्तोष सिग्देलले जानकारी दिए ।
“यो हाते पुस्तिका डिजिटल साक्षरता अभिवृद्धि गर्ने र सुरक्षित अनलाइन वातावरणलाई प्रवर्द्धन गर्ने एक उपयोगी औजार हो,” सिग्देलले भने ।
हाते पुस्तिकामा अनलाइन अभिव्यक्तिको स्वतन्त्रता, गोपनीयता, तथ्यांक संरक्षण, सूचनामा पहुँच, इन्टरनेट शासन तथा साइबर सुरक्षा लगायतका विषयहरू समावेश गरिएका छन् । साथै पुस्तिकाले डिजिटल साक्षरता बढाउन र अनलाइन स्पेसलाई सुरक्षित बनाउनका लागि व्यवहारिक मार्गदर्शन र उपयोगी सुझावहरू समेत प्रदान डिजिटल राइट्स नेपालले जनाएको छ ।
‘डिजिटल अधिकार र सुरक्षा’ सम्बन्धी हाते पुस्तिकाले सुसूचित र सुरक्षित डिजिटल समाजलाई प्रबर्द्धन गर्ने बढावा दिने एउटा महत्त्वपूर्ण कदम हुने प्रकाशकको दाबी छ । यो पुस्तिका अनलाइनमा रहेका आफ्ना अधिकारहरू बुझ्न र सुरक्षित गर्न खोज्नेहरूका लागि महत्त्वपूर्ण स्रोत रहने अपेक्षा प्रकाशकको छ ।
डिजिटल राइट्स नेपाल नेपालमा डिजिटल अधिकारको संरक्षण र प्रवर्द्धनमा समर्पित एक गैरनाफामुखी पहल हो । यस संस्थाले अनलाइन अभिव्यक्तिको स्वतन्त्रता, अनलाइन गोपनीयता, सूचनामा पहुँच, इन्टरनेट शासन, साइबर कानुन र नीतिहरू, र साइबर सुरक्षा जस्ता महत्त्वपूर्ण मुद्दाहरूमा केन्द्रित रही काम गर्दै आइरहेको छ ।
पुस्तिकाको सफ्टकपी पढ्नुहोस् तथा डाउनलोड गर्नुहोस् ।
