फेसबुक पेजहरूमा 'नेगेटिभ रिभ्यु' बढेपछि कतिपय प्रमुख मिडियाले रेटिङ हेर्न नमिल्ने बनाएका छन् ।
कान्तिपुर मिडिया ग्रुप अन्तर्गतका विभिन्न प्रलेटफर्मका फेसबुक पेजहरूबाट सुरु भएको नेगेटिभ रिभ्यूको बाढीले अहिले अरु मिडियालाई पनि सताएको छ । प्रयोगकर्ताहरूले नकारात्मक प्रतिकृया दिन थालेपछि ती पेजहरूमा रेटिङ हेर्न नमिल्ने बनाइएको छ ।
उदाहरणका लागि इकान्तिपुर डट कमको फेसबुक पेजमा आएका नकारात्मक रिभ्युका कारण यसको रेटिङ घटेको छ । टेकपानामा शुक्रबार प्रकाशित समाचारअनुसार औसत रिभ्यु २.४ मा झरेको छ । यो रेटिङ हेर्न नमिल्ने बनाउनुअघिको कुरा हो ।
कान्तिपुर मिडिया ग्रुपका अध्यक्ष कैलाश सिरोहियालाई प्रहरीले नागरिकता कसूरमा पक्राउ गरेपछि सञ्चार क्षेत्रबाट त्यसको विरोध भइरहेको छ भने समाजमा त्यसले मिश्रित प्रतिक्रिया उब्जाएको छ । जेठ ९ गते जब ठूला भनिएका सञ्चारमाध्यमका सम्पादकहरूले संयुक्त रुपमा पत्र लेखेर प्रधानमन्त्री पुष्पकमल दाहाल प्रचण्डको ध्यानाकर्षण गराए, त्यसपछि एकथरी मानिसहरू सामाजिक सञ्जालमा मिडियामाथि खनिएका छन् ।
गृहमन्त्री रवि लामिछाने स्वयं र उनी पहिले साझेदार रहेको गोर्खा मिडिया नेटवर्कले विभिन्न सहकारीमा आममानिसले राखेको करिब एक अर्ब रूपैयाँ अपचलन गरेका समाचार मिडियाले निरन्तर लेखिरहेको कारणले लामिछाने मिडियामाथि शत्रुभावका साथ जाइलागेको सम्पादकहरूको ठहर रहेको छ ।
सम्पादकहरूले प्रधानमन्त्रीलाई भेटेर ध्यानाकर्षण पत्र बुझाएपश्चात मानिसहरूले मिडियाहरूका फेसबुक पेजमा निरन्तर नकारात्मक रिभ्यू गरेका छन् ।
मानिसहरूले निरन्तर नेगेटिभ रिभ्यू गरेपछि अनलाइनखबर र रातोपाटीले पनि रेटिङ लुकाएका छन् । शनिबार बिहानसम्म अनलाइनखबर र रातोपाटीमा रेटिङ हेर्न मिल्थ्यो ।
सेतोपाटी, नेपालखबर, खबरहब,अन्नपूर्ण पोस्ट, नागरिकले रेटिङ 'इनेबल' गरेका छैनन् ।
अनलाइनखबर र रातोपाटीका फेसबुक पेजमा आएका केही प्रतिक्रिया ।
प्रयोगकर्ताले कुनै पनि फेसबुक पेजको रिभ्यू गर्न सक्छन् । यो भनेको उक्त पेजका बारेमा प्रयोगकर्ताको प्रतिक्रिया हो । इन्टरनेटमा धेरैजसो प्लेटफर्महरूले जुनसुकै उत्पादनका बारेमा प्रयोगकर्ताले प्रतिक्रिया दिन मिल्ने बनाएका हुन्छन् । राम्रो वा नराम्रो लागेमा प्रयोगकर्ताले रिभ्यू गर्न सक्छन् । मानिसहरूले गरेको रिभ्यूको आधारमा रेटिङ निर्धारण हुन्छ । राम्रो रिभ्यू भएमा रेटिङ बढ्छ, त्यस्तै नराम्रो रिभ्यू गरेमा रेटिङ घट्छ । फेसबुकमा यो बढीमा ५ मा हिसाब हुन्छ ।
