प्रेस काउन्सिलले किशोर श्रेष्ठ पक्राउ र उनको सञ्चार गृहमा छापा मारिएको शैलीप्रति आपत्ति जनाउँदै पत्रकारहरूलाई स्वतन्त्रताको नाममा स्वच्छन्द नहुन आग्रह गरेको छ ।

जनआस्था साप्ताहिकका सम्पादक किशोर श्रेष्ठको पक्राउ, उनको निवासमा भएको खानतलासी र सञ्चार माध्यमको कार्यालयमा छापा मार्ने कार्यप्रति प्रेस काउन्सिल नेपालले गम्भीर ध्यानाकर्षण भएको जनाएको छ ।

काउन्सिलका वरिष्ठ प्रशासकीय अधिकृत एवं प्रवक्ता दीपक खनालले बिहीबार जारी गरेको विज्ञप्तिमा प्रहरीको धरपकड र सञ्चार गृहमाथिको व्यवहारप्रति गम्भीर आपत्ति जनाइएको छ । 

पत्रकारहरूलाई पनि प्रेस स्वतन्त्रताको नाममा स्वच्छन्द नहुन काउन्सिलले सचेत गराएको छ ।  

प्रहरी धरपकड र कार्यालय छापा मारिएकोमा काउन्सिलको गम्भीर आपत्ति

प्रेस काउन्सिलले साउन २७ गते बुधबार राति सम्पादक श्रेष्ठलाई पक्राउ गरिएलगत्तै उनको घर र कार्यालयमा प्रहरीले गरेको खानतलासी तथा सामग्री जफत गर्ने शैलीप्रति गम्भीर असन्तुष्टि व्यक्त गरेको छ । 

विज्ञप्तिमा भनिएको छ: "आस्था मिडियाका अध्यक्ष तथा जनआस्था साप्ताहिकका सम्पादक किशोर श्रेष्ठलाई २०८३ साउन २७ गते बुधबार राती पक्राउ गरी उहाँको निजी निवास खानतलासी भएको र आज बिहानै उक्त सञ्चार माध्यमको कार्यालयमा हातहतियारसहित प्रवेश गरी कम्प्युटरलगायत सामग्री जफत गरिएको घटनाप्रति प्रेस काउन्सिल नेपालको गम्भीर ध्यानाकर्षण भएको छ।"

काउन्सिलले नागरिकको सूचनाको हक प्रेस स्वतन्त्रताबाटै सुनिश्चित हुने उल्लेख गर्दै प्रेसको मर्यादा कायम राख्नु राज्य र सम्बद्ध सबैको कर्तव्य भएको स्पष्ट पारेको छ ।

पत्रकारलाई चेतावनीः "प्रेस स्वतन्त्रताको नाममा स्वच्छन्दता स्वीकार्य हुन्न"

प्रहरीको कदमप्रति आपत्ति जनाए पनि प्रेस काउन्सिलले पत्रकार र सञ्चार माध्यमहरूको पछिल्लो कार्यशैली, व्यवहार र पेसागत आचरणप्रति चिन्ता व्यक्त गरेको छ । 

समाचारका नाममा पत्रकारहरू मर्यादित र जवाफदेही हुनैपर्ने काउन्सिलको जिकिर छ । 

विज्ञप्तिमा भनिएको छ: "काउन्सिल सञ्चारकर्मको क्रममा पत्रकार/सञ्चारकर्मीद्वारा प्रस्तुत कार्यशैली, व्यवहार तथा पेसागत मर्यादा एवं आचरणप्रति पनि उत्तिकै चिन्तित छ [१३]। प्रेस स्वतन्त्रताको प्रयोग गर्ने नाममा हुनसक्ने स्वच्छन्दतातर्फ सबै पत्रकार/सञ्चारकर्मी सचेत हुनैपर्दछ ।"

सत्य, तथ्य, सन्तुलित र विश्वसनीय पत्रकारिताको माध्यमबाट व्यावसायिक अभ्यासलाई उच्च, मर्यादित र उत्तरदायी बनाउनुपर्नेमा जोड दिँदै काउन्सिलले प्रेस स्वतन्त्रताको दुरुपयोग हुन नदिनेतर्फ सचेत गराएको छ ।

"सञ्चार सामग्रीमा चित्त नबुझे काउन्सिल आउनुस्"

प्रेस काउन्सिल नेपालले आफ्नो ऐन र स्थापित विधिअनुसार स्वस्थ पत्रकारिताको विकास गर्ने, प्रेस स्वतन्त्रताको दुरुपयोग रोक्ने, पत्रकार आचारसंहिता तोक्ने र प्रेस तथा सरकारबीच सौहार्दपूर्ण सम्बन्ध कायम राख्ने कानुनी जिम्मेवारी रहेको स्मरण गराएको छ ।

कुनै पत्रकार वा सञ्चार माध्यमले आचारसंहिता उल्लंघन गरेमा उजुरी लिने, छानबिन गर्ने, खण्डन छाप्न लगाउने, क्षमायाचना गर्न निर्देशन दिने, अवज्ञा गर्नेलाई कालोसूचीमा राख्ने र प्रेस पास निलम्बन गर्नेसम्मको स्पष्ट कानुनी अधिकार काउन्सिलसँग सुरक्षित रहेको विज्ञप्तिमा उल्लेख छ ।

त्यसैले समाचार सामग्रीका विषयमा चित्त नबुझेमा सीधै प्रहरी प्रशासन वा फौजदारी धरपकडमा जानुको सट्टा काउन्सिलकै ढोका ढक्ढक्याउन सरोकारवालालाई आग्रह गरिएको छ । 

विज्ञप्तिको अन्त्यमा भनिएको छ: "काउन्सिलले आफ्नो क्षेत्राधिकारभित्र रहेर दुवै दृष्टिकोणबाट पत्रकार र सञ्चारमाध्यमको अनुगमन गर्दै आएको विषयलाई मध्यनजर गरी कुनै समाचारको विषयमा चित्त नबुझे काउन्सिलमा उजुरी दिन सरोकारवाला सबै पक्षमा विनम्र अनुरोध गर्दछ ।"