त्रिभुवन विश्वविद्यालयको पत्रकारिता तथा आमसञ्चार केन्द्रीय विभागको प्रमुखमा सह-प्राध्यापक डा. कुन्दन अर्याल नियुक्त भएका छन् ।
यसअघिका प्रमुख प्रा. प्रबलराज पोखरेलले अनिवार्य अवकाश पाएपछि विश्वविद्यालयका उपकुलपति प्रा.डा.केशरजंग बरालले अर्याललाई चार वर्षका लागि विभागीय प्रमुखमा नियुक्त गरेको विश्वविद्यालयले जनाएको छ ।
१६ गतेबाट लागु हुनेगरी सह-प्राध्यापक डा.अर्याललाई विभागको प्रमुखमा नियुक्त गरेको त्रिभुवन विश्वविद्यालयका सूचना अधिकारी भिमबहादुर श्रेष्ठले जानकारी दिए ।
"प्रबलराज पोखरेल अनिवार्य अवकाशमा गएसँगै डा.कुन्दन अर्याललाई विभागको प्रमुखमा नियुक्त गरिएको हो",सूचना अधिकारी श्रेष्ठले मिडिया कुराकानीसँग भने,"यही १६ गतेबाट लागु हुने गरी उहाँलाई नियुक्त गरिएको हो ।"
पत्रकारिता र प्राज्ञिक क्षेकमा सक्रिय अर्यालले विभागीय प्रमुखमा नियुक्त भएपछि मिडिया कुराकानीसँगको कुराकानीमा समाचार कक्ष र कक्षाकोठाबीचको खाडल पुर्न काम गर्ने बताए ।
"पत्रकारितालाई नियमसंगत बनाउनको लागि न्युज रुम र क्लास रुमबीचको ग्यापलाई फुलफिल गर्ने काममा म केन्द्रित हुने छु," उनले भने । अर्यालले यसअघि पनि पत्रकारिता र यसको उच्च शिक्षालाई बलियो बनाउन न्युज रुम र क्लास रुमबीच सहकार्य हुनुपर्नेमा जोड दिँदै आएका छन् ।
को हुन् कुन्दन अर्याल ?
हाल अनौपचारिक क्षेत्र सेवा केन्द्र (इन्सेक)का अध्यक्षसमेत रहेका डा.अर्याल लामो समयदेखि पत्रकारिताको पेशागत र प्राज्ञिक क्षेत्रमा सक्रिय छन् ।
नेपाल प्रेस इन्सिच्युटबाट पत्रकारिता शिक्षा आरम्भ गरेका अर्यालले हातेमालो नामक पत्रिकाको नेतृत्व गर्दै पत्रकारिता थालेका थिए ।
त्यसयता उनले विभिन्न साप्ताहिक पत्रिकाहरूमा नेतृत्वदायी भूमिका निर्वाह गरेका छन् । अर्यालका मानव अधिकार र प्रेस, छापामा कार्टुन लगायतका पुस्तक समेत प्रकाशित छन् ।
अर्याल उपप्राध्यापकका रुपमा २०६८ सालदेखि त्रिविमा प्रवेश गरेका थिए । विश्वविद्यालय सेवा प्रवेशपूर्व उनले हिमाल खबर पत्रिकाको सम्पादकका रुपमा जिम्मेवारी सम्हालेका थिए ।
उनले २०७४ सालमा तत्कालीन प्रधानमन्त्री केपी शर्मा ओलीको प्रेस सल्लाहकारका रुपमा समेत काम गरेका थिए ।
२०४६ सालपछि नेपालको छापा पत्रकारिता कसरी दलीय पक्षधरताबाट व्यावसायिकतातर्फ उन्मुख भयो भन्ने विषय (‘ट्रान्जिसन अफ न्युजपेपर जर्नालिज्म फ्रम पार्टेसनसीप टू कमर्सिलिज्म इन पोस्ट १९९० नेपाल’) मा उनले विद्यावारिधि गरेका हुन् ।
लामो सयमसम्म प्रदर्शनीमार्गस्थित रत्नराज्यलक्ष्मी क्याम्पस परिसरबाट सञ्चालित त्रिविको पत्रकारिता केन्द्रीय विभाग अहिले बल्खुस्थित नवनिर्मित भवनमा सरेको छ ।
