के तपाईं १८ देखि २५ वर्षको युवा हुनुहुन्छ र क्यामेराको माध्यमबाट समाज र वातावरणका कथा भन्न चाहनुहुन्छ ? यदि हो भने, डकस्कुलले तपाईंको लागि एउटा विशेष अवसर लिएर आएको छ ।
डकुमेन्ट्री ओपन स्कुल (डकस्कुल) नामक संस्थाले युवा सञ्चारकर्मी तथा वातावरणीय अभियानकर्मीका लागि ६ महिना लामो 'ग्रिन मिडिया फेलोसिप २०२६' का लागि आवेदन खुल्ला गरेको छ ।
यो फेलोसिप सन् २०२६ सेप्टेम्बरदेखि २०२७ मार्चसम्म सञ्चालन हुने पूर्ण आवासीय तालिम हो ।
यो कार्यक्रमले डकुमेन्ट्री फिल्म, फोटोग्राफी र सामुदायिक सञ्चारको सीप प्रदान गर्ने उद्देश्य राखेको छ ।
१८ देखि २५ वर्ष उमेर समूहका कम्तीमा माध्यमिक शिक्षा पूरा गरेका नेपाली नागरिकले यसमा आवेदन दिन सक्नेछन् ।
कार्यक्रमले विशेषगरी आदिवासी, जनजाति, महिला, क्वयेर समुदाय र वातावरणीय क्षेत्रमा सक्रिय युवाहरूलाई प्राथमिकता दिने आयोजक संस्थाले जनाएको छ ।
मुख्यगरी सहभागीहरूले यसपटक धुलिखेल र उदयपुरमा फिल्डमै गएर डकुमेन्ट्री तथा फोटोग्राफीका सिपहरू सिक्ने छन् ।
यो फेलोसिपलाई तीन चरणमा विभाजन गरिएको छ ।
- पहिलो चरण (३ महिना): फोटोग्राफी, फिल्म निर्माण, सिनेमाटोग्राफी, सम्पादन र रेडियो उत्पादन सम्बन्धी प्राविधिक तालिम।
- दोस्रो चरण (२ महिना): विभिन्न साझेदार साइटहरूमा व्यक्तिगत र सामूहिक फिल्म प्रोजेक्टको निर्माण।
- तेस्रो चरण (१ महिना): विशिष्ट कार्यशाला, डकुमेन्ट्री विनिर्माण र परियोजनाहरूको प्याकेजिङ।
तालिमको समापनमा काठमाडौंमा दुई दिने 'ग्रिन मिडिया फेस्टिबल' आयोजना गरिनेछ, जहाँ सहभागीहरूले तयार पारेका चलचित्रहरू प्रदर्शन गरिनेछन् ।
सफल सहभागीहरूले डकस्कुलबाट 'Diploma in Creative Community Media' प्राप्त गर्नेछन्।
छनोट भएका १० जना सहभागीका लागि यो कार्यक्रम पूर्ण रूपमा नि:शुल्क रहनेछ । सहभागीहरूलाई ६ महिनाको आवास, ३ महिनाको निर्वाह भत्ता (स्टाइपेन्ड) र तालिम केन्द्रसम्मको आउने-जाने खर्च समेत प्रदान गरिनेछ ।
इच्छुक आवेदकले अगस्ट १५, २०२६ भित्र अनलाइन फारम भर्नुपर्नेछ । आवेदनका साथमा १० वटा तस्बिर, कम्तीमा ३ मिनेटका २ वटा भिडियो र एउटा सिफारिस पत्र अनिवार्य रूपमा पठाउनुपर्नेछ ।
